انا والله شخص جديد على المنتدى وصدقوني قسم بالله ما اعرف احد في ا المنتدى لكن شدني في القوقل اسم ذا المنتدى وبطرح موضوع والله اتعبني له فيني ثلاث سنوات حتى في مستواي الجامعي ودراستي اثر فيني بشكل كبير لدرجة وصلت فيه لحد الجنون ....
صدقوني يا اخواني الاعزاء انا ما بيني وبينك الا ذا الشاشه عشان كذا اكتب كل مافي خاطري بمنتهى الحريه وبدون تردد واخترت ذا المنتدى حتى اكتب فيه الاحساس اللي حسيته لاني حسيت باسم ذا المنتدى اعيش فيه دوره....
بدون تردد وبدون اي خجل بقول معلومه بسيطه حتى ادخل في صلب الموضوع وتفهموني وش اللي انا حاب اوصله...
انا تخرجت مدرس الان وعمري 25 سنه وتخصصي علوم وبكمل حياتي مثل باقي ذا الناس لان الحياه فيني وبلياني بتستمر ولازم تستمر ذا الحياه....
اخواني واخواتي شباب وبنات ارجو منكم رجاء خاص كل من يدخل ذاالصفحه وذا الموضوع اللي ابي الاقي له حل انه لا يتجاهله نهائي ويكتب لي رد على موضوعي ذا لاني والله بحاجة اي رد يفيدني فيه....
اعزائي انا في ذا الليله بنثر مافي خاطري بدون تردد وخلوكم معاي...
قبل 13 سنه حبيت انسانه تقرب لي لحد الجنون اول انسانه في حياتي واول حب وعشق عرفته من صحيت على ذا الدنيا ...
كنا صغار ودوم ازورهم في بيتهم والله عشان خاطرها قبل الجوال وقبل النت وكان عمري وقتها 11 سنه وكنت ادرس في صف خامسي ابتدائي لكن قسم بالله كنت احس باحساس غريب لما اشوفها وانا في ذاك السن من عمري وهي كانت نفس الشعور وكانت هي من تجي وتسحبني من مجلسهم لحديقة البيت ونلعب سوا لكن قسم بالله وقتها احس بشي غريب وقوي ناحيتها وكانت دايم تمسك يدي ووين ما راحت تاخذني معاها...
المهم واسترمينا على ذا الحال الى صف ثالث ثانوي وهي كانت بنفس عمري وكنت اقابلها ورى بيتنا او بيتهم بالخفيه ومتعلقين في بعض لابعد الحدود لدرجة قسم بالله الشي اللي انا احس فيه هي تحس فيه....
وبعد ما تخرجت انا انتقلنا لديره غير ديرتنا بحكم اني اكبر اخواني واهلي نقلو معاي وهم تمو في نفس الديره لان ابوها ماسك منصب كبير مو سهل في الدوله اللي يصير لي (خالي)...
المهم انقطعت اخباري واخبارها عني بعد كذا لان ابوي وخالي كانو على خلاف كبير مع بعض بسبب زواج ابوي من امي لانه هو اللي كان معارض عليه بقوه....
وبعد سنتين من انقطاعنا عن بعض طلعت الجوالات وصارت رخيصه وفي منتاول الشعب انا اشتريت جوال وكان همي الوحيد كيف اني اوصل لها رقمي باي طريقه وكنت حافظ رقم بيتهم وادور اي عذر حتى ارجع علاقت اهلي وابوي فيهم بعد المشاكل اللي صارت ( لاني انا وامي كنا الوحيدين الي نزور بيت خالي ابوي وباقي اهلي لا)...
المهم كنت اتلقط اخبارهم من اخواتي المتزوجات عندهم في نفس المنطقه وكنت بطريقه غير مباشره احاول اجيب اخبار بيت خالي ....
اللي بيني وبين البنت والله محد عارف فيه شي لكن كانو اهلي يلاحظون لما كانو يجونا ان البنت كانت تسال عني بشكل كبير واهتمام لابعد الحدود....
المهم ومالكم في الطويله لي خاله أكبر مني بسنه وتصير عمت بنت خالي يعني (اخت ابوها) وكان علاقتي في خالي ذي صريحه جدا وعارفه بمدى علاقتي ببنت خالي ذي يعني عارفه البير وغطاه باختصار....
المهم بعد انقطاع دام لاكثر من سنتين قدرت اتوصل لارقام عيال خالي وقدرت كذالك اكلم خالاتي وبالتحديد ابي اكلم خالتي ذي اللي عارفه كل شي وانا وقتها كنت بثاني كليه الترم الثاني...
المهم كلمتها وسلمت عليها وصرنا نكلم بعض كل يوم وصارت تروح لعند بنت خالي متعمده تكلمني عندها حتى تزيل بعض الحواجز بيننا لان بنت خالي كانت مستحيه حيل ومتررده انها تكلمني بحكم كلامها ( كبرنا وعيب نسوي كذا..!)
المهم في يوم من الايامخالتي كلمتني بكل صراحه وقالت لي انت تبي فلانه من يوم كنت صغير وللحين تبيها فرديت عليها بكل صدق والله ابيها حتى شكلها مو ناسيه....
قالت لي ما تقدر تتزوجها
قلت ليش
قالت لانها تصير اختي من الرضاعه يعني بتصير خالتك من الرضاعه وهي جنبي الان تبي تكلمك
انا انصدمت وقلت لا تكلمني ولا شي انا بتاكد من الموضوع بنفسي
المهم سالت امي بطريقه غير مباشره وقلت لها ان فلانه تصير خالتي معقوله يمه..؟
قالت لا مستحيل لان جدتك غير جدتها وانا اصير لهم اختهم من ابوهم يعني فلانه بنت خالك ومستحيل تكون خالتك
المهم بعد اسبوع من ذا الموضوع جبت الجواب الشافي انه فلانه تصير بنت خالي
ورجعت لخالتي وكلمتها بالجوال وفهمتها ان فلانه بنت خالي يعني اقدر اتزوجها ومافي شي يمنع
فرحت خالتي وقالت حنا عارفين من أول بس بنشوف احساسك للحين قوي ناحيتها وهي تسمع جنبي (فلانه)
المهم بنت خالي اتصلت علي باخر الليل واستمرت علاقتي فيها هي وخالتي مده تسع شهور متواصله والجوال ما يطفي لا لليل ولا نهار والدنيا في عيني والله أجمل شي.....
بعد تسع شهور يا اخواني ويا اعزائي تصدقون بعد كل ذا السنين توصلني رساله من جوال خالتي تقول فيها ؛
( تعيش وتاكل غيرها كان أطول وأجمل مقلب فيك اللي سوينا شرايك في مقلبنا انا وفلانه يا قيس )
فهمتو وش يقصدون يا أعزائي فهمتو وش المغزى ...؟
يعني كل اللي بيني وبين بنت خالي مجرد تسليه فيني فقط لاغير ......!!
عشر سنين وتسع شهور وفي الاخير يكون ذا حقي وقدري عليها.......!!
والمصيبه لقيت كل خالاتي عارفين بالموضوع كله لان خالتي وبنت خالي كانو يفتحون الاسبكر او المكبر في الجوال لما كانت بنت خالي وخالتي يكلموني وقدام الكل.....!!!
وافتضح المضمون والخافي وانا اللي كنت احرص على ان محد يعرف شي عن علاقتنا خوف عليها او ان خالي يدري والنتيجه لاقيها كذا.....!!!!!
بعد ذا الحركه قفلت جوالي ونسيت الدنيا والعالم وعتزلت الناس مدة سنه واصبحت من كليتي للبيت وبدون جوال ولا حكيت لاحد نهائي كتمت السر ولا بحته....
بكيت اي والله بكيت
تحطمت قسم بالله تحطت
كرهت الدنيا كرهتا وربي في ذاك الوقت
اصحى من نومي والدمع والله على خدي
انهزت ثقتي في نفسي
اي موقف سواء قدامي او في شاشة التلفزيون ينجرح فيه احد اقسم بالله لا ارادي يختلف لوني واطلع من المجلس اخاف افتضح
الكليه مستواي صار فيها تحت الصفر ومعدلي طاح بقوه بس سايرت الامر والموضوع قد ما قدرت دون محد يحس في شي واتاخرت سنه في تخرجي....
المهم استمر ذا حالي مده سنه ونص وبعدها طلعت جوال ورقم جديد واستمريت في حياتي وبعد ثلاث شهور من رقمي الجديد اتصل علي رقم غريب ورديت عليه فكانت خالتي اللي كانت عارفه كل شي فبدون مقدمات قفلت السماعه بوجهها وطنشتها واستمر حالي كذا مده شهور....
فصارت ترسل لي تتاسف هي وبنت خالي وبنفس الوقت يرسلون وسائط فيها اصواتهم وهم يترجو ويتاسفون....
انا نهيت كل شي واستمر حالهم كذا مده سنتين حتى يأسو مني لدرجة كبيره...
المهم تخرجت ورجعنا للمنطقه ولبيتنا وسكنا فيه وطبعا خالتي تزوجت وصار عندها بنت
وبنت خالي تزوجت واحد اصغر منها بسنتين وممرض وزواجها في 11/7/1430 يوم السبت.....
المهم صدقوني انا اللي راح راح مالي فيه نهائي لكن بفهم شي واحد بغض النظر عن جرحي اللي والله ما قدرت انسى ذا البنت واللي سوته فيني وكيف ارخصت عشر سنين بحركه للحين والله مالقيت لها اي تفسير..؟؟
المصيبه لو قالت لي بنفسها انها هي غضت النظر والله ما عندي اي مشكله بس ليش سوت كذا هي وخالتي..؟؟؟
وش المقصد وش المغزى وش الهدف منه..؟؟
والمصيبه نفسها ذي خالتي من سكنت المنطقه اللي انا فيها وهم عندنا بنفس المنطقه (خوالي وخالاتي) لي تقريبا سنه واربع شهور لا جيتهم ولا سلمت على احد فيهم والبارح بتاريخ 25/11/1430 تعبت عندنا في البيت مسوين زياره عندنا وانا من وديتها المستشفى وشلتها على يديني لانها كانت تعبانه حيل.....!!!
ذا اول لقاء بيني وبينها بعد اللي صار وبعد المستشفى رجعت تبكي على صدري وتقول انسى يا (فلان) سامحني والله تجيني حتى في احلامي....!!
رجعتها للبيت بدون اي كلمه لان اللي صار نسيته ولا ابي اي شي يربطني فيه لا من بعيد او قريب وباستمر بقطع علاقتي بكل من يذكرني في الماضي سواء خالاتي او عيال خالي وبتم كذا......
بس بفهم شي واحد معقوله انا سخيف للهدرجه...؟
معقوله احساس الانسان كذا يكون مسخره...؟
والمصيبه عشان انساها طحت في العلاقات غير الشرعيه...!!!
ابي ارجع احساسي ابي انسى ابي احاول اني لما اتزوج اعطي زوجتي كل احساسي لكن والله مافيني احساس احسني بارد وعلى قد ما احاول اسيطر على غضبي ما اقدر ؟؟
وين اول ووين اللحين ؟؟؟
انا طرحت ذا الموضوع وسردت فيه والله قصتي وقسم بالله هذا اللي صار واتوقع فهمتو وش اقصد من طرح قصتي في موضوعي....
موضوع الحب هو فيه حب والا شلون...؟
الحب تسليه لفتره معينه والا ارتباط....؟
فرق كبير بالاحساس والمشاعر والله فرق عند كثير من الناس
تسليه المشاعر عند بعض الناس هي فعلا متعه والا تضحيه والا حب ارضاء النفس بالغرور...؟
حطوها حلق في اذونكم والتجربه خير برهان
سؤالــــــــــــــــــي
(( وش خطاي ))
وشكري وعرفاني لصاحب المنتدى والمشرفين القائمين عليه (يعطيكم العافيه)......
موضوع: قصة واقعية لعب مشاعر 